దేవ, మనుష్య, పశు, పక్ష్యాదుల రూపంలో జీవులు అనేకులై ఉన్నారు. జీవాత్మ విభువే అంటే అంతటా వ్యాపించి ఉండే వాడే అని కొందరంటారు. కాదు జీవాత్మ ఒక చోట ఉండే సూక్ష్మ వస్తువే అణువే అని కొందరంటారు. 'ఏ షోణురాత్మా చేత సావేదితవ్యః' ఈ అణువైన ఆత్మ మనస్సుచే తెలుసుకొనదగినవాడు అని ముండకోపనిషత్ వాక్యం. 'వాలాగ్రశతభాగస్య శతధా కల్పితస్యచ భాగో జీవ సవిజ్ఞేయః' తోకగల వరిగింజ తోకలోని కొనను నూరు భాగాలు చేసి, అందులో ఒక భాగాన్ని తిరిగి నూరు భాగాలు చేసిన వానిలో ఒక భాగమంటే జీవాత్మ స్వరూపం ఉంటుందని శ్వేతాశ్వ చర ఉపనిషత్తు(5-9-8)వివరిస్తున్నది. 'ఆరాగ్రమాత్రో' - ఒక సూది మొన పరిమాణంలో ఆత్మ ఉంటుందట. ఆ అణువంత ఆత్మ, దేహమంతా సుఖదుఃఖాదులనెలా అనుభవిస్తుంది? అంటే దీపం ఒక ఇంటిలో ఒక చోట ఉన్నా దాని కాంతి ఇల్లంతా వ్యాపించినట్లు ఆత్మ గుణమగు జ్ఞానం దేహమంతా వ్యాపించి, అనుభవాలను ఇస్తుందని బృహదారణ్య కోపనిషత్తు వాక్యం.
కామెంట్‌లు లేవు:
కామెంట్‌ను పోస్ట్ చేయండి