ఇంటీరియర్ డెకరేషన్

సరసమైన సర్దుబాటు

ఇంటీరియర్ డెకరేషన్

ఇప్పుడు మనం ‘‘ఇంటీరియర్ డెకరేషన్’’ అనే మాటని బాగా వింటున్నాం. ఇంటినొక సాంకేతిక సీమగా, సర్వవసతుల నిలయంగా మార్చుకుంటున్నాం. ఇంటిని అందంగా అలంకరించుకోవటానికి వస్తువులు, సకల సదుపాయాలు ఇబ్బడి ముబ్బడిగా ఇప్పుడు మార్కెట్లో ప్రత్యక్ష మవుతున్నాయి. అన్నీ ముఖ్యమైనవీ, అత్యవసరాలు అని కూడా అనిపిస్తాయి. హోదాని పెంచేందుకు, హుందాగా జీవించేందుకు అవి తప్పనిసరే అనిపిస్తాయి. మరి అలా అనుకుంటూపోతే ఇంట్లో మనకున్న పరిమితమైన స్థలంలో వాటిని సర్దుకోవటం పెద్ద సమస్యగా మారుతుంది.
‘‘ననె్నక్కడ పెడతావు?’’ అన్నట్టుగా వస్తువులు మనల్ని చూస్తుంటాయి. తరచుగా అద్దె ఇళ్లు మారే వారికి ఇది మరింత తలనొప్పిగా పరిణమిస్తుంది. కుటుంబ సభ్యులందరూ కలిసి మెలసి ఉంటే ఇంట్లో ఎంత ప్రశాంతత ఉంటుందో వస్తువులన్నీ తమతమ నెలవుల్లో కొలువుతీరితే ఇంటికి వచ్చే ఆ అందమే వేరు. ఆనందమే వేరు. మరి ఈ సరసమైన సర్దుబాటుకు సంబంధించిన పద్ధతులేంటో చూద్దాం.
ఇంటిని పరిశుభ్రంగా, అందంగా తీర్చిదిద్దుకుంటే గౌరవం, మంచి హోదా లభిస్తుంది. వారివారి స్థాయిల్ని బట్టి ఎన్నో రకాలుగా అందంగా అలంకరించుకోవచ్చు. ఇంటిని చూసి, ఇల్లాలిని చూడమన్నారు పెద్దలు. ఇంటిని ఎంత చక్కగా దిద్దుకుంటే అంతపేరు ప్రతిష్ఠలు వస్తాయి. అందుకే ఇంటిపై పెక్కు శ్రద్ధ చూపండి. ఇంటిని శుభ్రంగా పెట్టుకోక పోతే చాలామందికి విరక్తి పుడుతుంది. సామాన్లతో ఇంట్లోని గదులన్నిటినీ నింపేస్తే చాలా చికాకుగా కనిపిస్తుంది. గదిలో ముప్పావు భాగం లేదా సగభాగమైనా ఖాళీగా వదిలేసి చూడటానికి విశాలంగా కనిపిస్తుంది. గదులన్నీ సామాన్లతో నింపేస్తే ఎంత విశాలమైన ఇల్లయినా చిన్నదిగానే కనిపిస్తుంది.
ఒక గదికి ద్వారాలు ఎక్కువగా ఉన్నప్పుడు వస్తువుల అమరిక కష్టమవుతుంది. ఉదాహరణకు లివింగ్ కం డైనింగ్ రూంకు ప్రధాన ద్వారం కాకుండా మరోనాలుగు ద్వారాలు అదనంగా ఉన్నప్పుడు అంటే బెడ్ రూంలు, టాయ్‌లెట్, కిచెన్ ద్వారాలుంటే సోఫాలు, కుర్చీలు, డైనింగ్ టేబుల్ అమర్చడం కష్టంగానే ఉంటుంది. ఇవి తప్పనిసరిగా అమర్చవలసినవి కాబట్టి గదుల్లో స్థలం ఉన్నప్పటికీ అది ఒక గదిలో నుండి ఇంకో గదిలోకి వెళ్లడానికి దారిగా మాత్రమే ఉపయోగపడుతుంది. ఇలాంటి గదులు ఉన్నవారు స్థలం ఎక్కువగా ఆక్రమించే సోఫాలు గట్రా వాడకపోవడం మంచిది.

ఆకర్షించే లివింగ్ రూం...

ఇంటికి వచ్చే అతిథులు ముందుగా చూసేది లివిలింగ్ రూం. కాబట్టి మనస్థాయికి తగినట్టుగా అతిథులను ఆకట్టుకునే విధంగా అమర్చుకోవాలి. స్థిరంగా ఒకచోట ఉండకుండా ఇల్లు మారుతూ ఉండే వారు లివింగ్ రూంలో అమర్చుకునే కుర్చీలు, సోఫాలు ఏ ఫ్లోర్‌కైనా నప్పే విధంగా సహజమైన రంగులను ఎంపిక చేసుకోవాలి. సోఫాలు, కుర్చీలు, దివాన్ బెడ్‌లు వంటివి గోడవారగా ఉంటే బాగుంటుంది. పైగా అవి స్థలం ఎక్కువగా ఆక్రమించినట్టుగా కనిపించదు. గది మధ్యలో వేస్తే నడవటానికి ఇబ్బందే కాకుండా గది కూడా విశాలంగా అగుపించదు. గదిలో వెలుతురు ఎక్కువగా ఉండి, గది విశాలంగా ఉన్నప్పుడు దివాన్ కవరు, కుషన్ కవర్స్ ముదురు రంగులయితేనే అందంగా, ఆహ్లాదంగా కనిపిస్తుంది. అలాగే కర్టెన్లు కూడా కుర్చీలకు, సోఫాలకు, దివాన్ సెట్స్‌కు వాల్ హాంగింగ్స్‌కు మ్యాచ్ అయ్యేలా చూసుకోవాలి. లివింగ్ రూంలో ఎటాచ్‌డ్ టాయ్‌లెట్స్ ఉన్నప్పుడు అక్కడ కర్టెన్లు వేయడమో లేదా తలుపునకు పోస్టర్ అమర్చడమో చేయాలి. ఇంకా అందంగా కనిపించాలంటే కర్టెన్లకు బదులుగా కర్టెన్ హాంగింగ్స్ వాడుకోవచ్చు.
కర్టెన్లు కుట్టించేటప్పుడు లోపలికి మడతలు ఎక్కువగా ఉంచుకున్నట్లయితే కిటికీలు పెద్దవైనా, చిన్నవైనా అమర్చుకోవడానికి వీలుగా ఉంటాయి. ప్రతిసారీ కొత్త కర్టెన్లు కొనే అవసరం రాకుండా తరచూ బదిలీలపై వెళ్లేవారు ఇది తప్పనిసరిగా గుర్తుంచుకోవాల్సిన విషయం.